काठमाडौँ । नेता रवीन्द्र मिश्रले अर्थमन्त्री स्वर्णिम वाग्लेलाई लक्षित गर्दै सामाजिक सञ्जाल फेसबुकमार्फत लामो टिप्पणी सार्वजनिक गरेका छन्। उनले वाग्लेलाई करिब ३० वर्षदेखि नजिकबाट चिनेको उल्लेख गर्दै उनको क्षमता, इमानदारी र दृष्टिकोणप्रति विश्वास व्यक्त गरेका छन्।
मिश्रले वाग्लेलाई “नेपालमा मैले देखेको बहुआयामिक क्षमता भएको एकमात्र व्यक्ति” भन्दै प्रशंसा गरेका छन्। उनले वर्तमान अवस्थामा देशलाई सही नेतृत्व र दूरदर्शी नीतिको आवश्यकता रहेको बताएका छन्।
उनले अर्थमन्त्रीका रूपमा वाग्लेले सुशासन, आर्थिक सुधार र दीर्घकालीन विकासमा केन्द्रित हुनुपर्नेमा जोड दिएका छन्। साथै, भ्रष्टाचार, लुटपाट र जनतामाथि भइरहेको अन्यायप्रति गम्भीर चिन्ता व्यक्त गर्दै यस्तो अवस्थाले आफूलाई मात्र नभई राष्ट्रको आत्मासमेत कम्पित बनाउने बताएका छन्। “नेपाली जनताविरुद्ध भइरहेको अपराध र लुट देख्दा शरीर मात्र होइन, आत्मा नै काँप्छ,” भन्ने भाव उनले व्यक्त गरेका छन्।
मिश्रले विशेषगरी अव्यवस्थित शहरीकरण र कमजोर भू–उपयोग नीतिका कारण नेपालका शहरहरू अस्तव्यस्त बन्दै गएको उल्लेख गरेका छन्। समयमै सुधार नगरे काठमाडौं उपत्यकासहित ठूला शहरहरू भविष्यमा बस्न अयोग्य बन्न सक्ने चेतावनी पनि उनले दिएका छन्।
उनले अर्थमन्त्री वाग्लेलाई आगामी बजेटमार्फत वैज्ञानिक शहरीकरण, व्यवस्थित बसोबास र दीर्घकालीन भू–उपयोग नीति ल्याउन आग्रह गरेका छन्। साथै, उपत्यकामा निश्चित दूरीमा खुला क्षेत्र, पार्क र खेल मैदानका लागि योजनाबद्ध रूपमा जग्गा अधिग्रहण गर्नुपर्ने सुझाव पनि दिएका छन्।
मिश्रका अनुसार सरकारले उचित मुआब्जासहित जग्गा अधिग्रहण गर्न सके समस्या नहुने भएकाले यससम्बन्धी कानुनी सुधार आवश्यक छ। अन्यथा, आगामी ३० वर्षमा काठमाडौं उपत्यका कंक्रिटको जंगलमा परिणत हुने खतरा रहेको उनले चेतावनी दिएका छन्।
अन्त्यमा, उनले अर्थमन्त्री वाग्लेको आगामी बजेट नेपालका लागि ऐतिहासिक मोड बन्न सक्ने विश्वास व्यक्त गर्दै आफ्नो सन्देश सम्बन्धित निकायसम्म पुग्ने अपेक्षा गरेका छन्।
