काठमाडौं । देशभर मनसुनी वायुको प्रभाव कायम रहँदा आज पनि विभिन्न प्रदेशमा वर्षाको सम्भावना रहेको छ। मौसम पूर्वानुमान महाशाखाका अनुसार मनसुनको न्यून चापीय रेखा नेपालको पूर्वी भू-भागमा सरदर स्थानको आसपास तथा पश्चिम भू-भागमा सरदरभन्दा उत्तरतर्फ रहेकाले देशका अधिकांश क्षेत्रमा बदली र वर्षाको अवस्था रहनेछ।
आज दिउँसो देशका हिमाली तथा पहाडी भू-भागमा साधारणतया बदली रहनेछ भने बागमती, गण्डकी र लुम्बिनी प्रदेशका तराई क्षेत्रमा पनि बादल लाग्नेछ। मधेश प्रदेश तथा कोशी र सुदूरपश्चिम प्रदेशका तराई क्षेत्रमा आंशिक बदली रहने पूर्वानुमान गरिएको छ।
महाशाखाका अनुसार देशका पहाडी भू-भागका धेरै स्थानमा मेघगर्जन तथा चट्याङसहित मध्यम वर्षाको सम्भावना रहेको छ। हिमाली क्षेत्रका केही स्थानमा मध्यम वर्षा वा हिमपात हुन सक्नेछ। यस्तै, बागमती, गण्डकी र लुम्बिनी प्रदेशका तराईका केही स्थान तथा कोशी, सुदूरपश्चिम र मधेश प्रदेशका केही स्थानमा पनि मेघगर्जन तथा चट्याङसहित वर्षा हुने सम्भावना रहेको छ।
विशेषगरी बागमती, गण्डकी, लुम्बिनी, कर्णाली र सुदूरपश्चिम प्रदेशका पहाडी भू-भागका एक–दुई स्थानमा भारी वर्षाको सम्भावना रहेकाले सतर्कता अपनाउन महाशाखाले आग्रह गरेको छ।
आज राति पनि देशका हिमाली तथा पहाडी भू-भागसहित कोशी, मधेश, बागमती र गण्डकी प्रदेशका तराई क्षेत्रमा साधारणतया बदली रहनेछ। लुम्बिनी र सुदूरपश्चिम प्रदेशका तराई क्षेत्रमा आंशिक बदली रहने अनुमान गरिएको छ।
रातिको समयमा पनि पहाडी भू-भागका केही स्थानमा मेघगर्जन तथा चट्याङसहित मध्यम वर्षा हुने सम्भावना रहेको छ। बागमती, गण्डकी, लुम्बिनी र सुदूरपश्चिम प्रदेशका तराईका केही स्थान, कोशी प्रदेशको तराई तथा मधेश प्रदेशका थोरै स्थानमा वर्षा हुन सक्ने महाशाखाले जनाएको छ।
यसैगरी, बागमती, गण्डकी र लुम्बिनी प्रदेशका पहाडी भू-भागका एक–दुई स्थानमा रातिको समयमा समेत भारी वर्षाको सम्भावना रहेकाले नदी–नाला आसपासका बासिन्दा, सडक यात्री तथा पहाडी क्षेत्रका नागरिकलाई आवश्यक सतर्कता अपनाउन मौसमविद्हरूले सुझाव दिएका छन्।
