काठमाडौं। नेपाली बजारमा सुनको भाउ फेरि बढेको छ। नेपाल सुन–चाँदी व्यवसायी महासंघका अनुसार आज सुनको मूल्य प्रतितोला १४ हजार ४०० रुपैयाँले वृद्धि भएको हो। मूल्य बढेसँगै सुन प्रतितोला ३ लाख ४ हजार ७०० रुपैयाँमा कारोबार भइरहेको छ, जसले सुनको दर पुनः ३ लाख रुपैयाँ नाघेको देखाएको छ।
यसअघिल्लो कारोबार दिन मंगलबार सुन प्रतितोला २ लाख ९० हजार ३०० रुपैयाँमा किनबेच भएको थियो। सो दिन पनि सुनको मूल्य ३ हजार ७०० रुपैयाँले बढेको थियो।
यस्तै, आज चाँदीको भाउ पनि बढेको छ। महासंघका अनुसार चाँदी प्रतितोला २६५ रुपैयाँले महँगिएको हो। मूल्यवृद्धिपछि चाँदी प्रतितोला ५ हजार ६०० रुपैयाँमा कारोबार भइरहेको छ। मंगलबार चाँदी प्रतितोला ५ हजार ३३५ रुपैयाँमा किनबेच भएको थियो।
यसअघि माघ १५ गते सुनको भाउ प्रतितोला ३ लाख ३९ हजार ३०० रुपैयाँ पुगेको थियो, जुन हालसम्मकै उच्च विन्दु हो।
