पश्चिमी वायुले फेरि मौसम गडबढ
माघ १८, २०७५ । युरोपेली वायुको प्रभावका कारण पुनः देशैभरिको मौसम प्रभावित भएको छ। बुधबार नेपाल भित्रिएको जलवाष्पयुक्त वायुको प्रभावले हल्का वर्षा र हिमपात दोहोरिएपछि फेरि चिसो बढेको छ।
आज शुक्रबार र भोलि शनिबार पनि यस्तै प्रभाव यथावत् रहने जल तथा मौसम पूर्वानुमान महाशाखाले जनाएको छ। शुक्रबार काठमाडौंको मौसम केही खुला भए पनि पूर्णरूपमा नखुल्ने र अन्यत्रको मौसम पनि दिनभरजसो प्रभावित रहने महाशाखाका मौसमविद् वरुण पौडेलले बताउनुभयो।
अहिलेको मौसमी प्रणाली गत साताको जस्तो प्रभावकारी र निरन्तर झरी गराउने प्रकृतिको नभए पनि मौसम भने प्रभावित बन्ने उहाँले जानकारी दिनुभयो। पौडेलले शुक्रबार साँझ भन्नुभयो– ‘देशैभरको मौसम धुम्मिएर पश्चिमी पहाडी र अन्य हिमाली भेगमा हिमपात र वर्षासमेत हुनेछ, तराईका भू–भाग केही सफा भए पनि पूर्वी पहाडी भेगको मौसम पूर्णरूपमा खुल्दैन।’
अहिलेको मौसमी प्रभावले हरेक दिन हवाई भिजिविलिटी पनि घटिरहेको त्रिभुवन अन्तर्राष्ट्रिय विमानस्थल कार्यालयले जनाएको छ। खास गरी माउन्टेल फ्लाइट र बिहानीपखका अन्य उडानका लागि पर्याप्त भिजिविलिटी नभएको कार्यालयका अधिकारी बताउँछन्। मौसम पूर्वानुमान महाशाखाका अनुसार बिहीबार बिहान ११ बजेपछि मात्रै विमानस्थलको मौसममा सुधार आएको थियो। महाशाखाकी मौसमविद् मञ्जु बासीले भन्नुभयो– ‘बिहान ११ बजे अघिको भिजिविलिटी १ हजार ५ सय मिटरका हाराहारीमा थियो, ११ बजेपछि भने ३ हजार मिटरको हाराहारीमा पुग्यो।’
विज्ञहरूका अनुसार १ किलोमिटर हाराहारारीको भिजिविलिटीमा विमान अवतरण गर्न मिले पनि उडान गर्न सहज हुँदैन। विज्ञहरूका अनुसार त्रिभुवन विमानस्थलबाट जहाज सहज रूपमा उड्न २ हजार वा सोभन्दा माथिको भिजिविलिटी आवश्यक हुन्छ। विमानस्थल कार्यालयका प्रवक्ता प्रतापबाबु तिवारीले भने मौसमका कारण हवाई सेवा प्रभावित नभएको बताउँदै नेपाल समाचारपत्रसँग भन्नुभयो– ‘गत वर्षको तुलनामा यसपटक उडान त्यति धेरै प्रभावित भएको छैन।’यो खबर नेपाल समाचारपत्रबाट लिएका हौ।
