१ लाख रुपैयाँ घुससहित पक्राउ
माघ १, २०७५ । अख्तियार दुरूपयोग अनुसन्धान आयोगले कम्पनी रजिष्ट्रारको कार्यालय त्रिपुरेश्वरकी सहायक रजिष्ट्रार गीता कुमारी पन्थीलाई पक्राउ गरेको छ ।
पन्थीले सेवाग्राहीसँग लिएको १ लाख रुपैयाँ घुस छोरीलाई राख्न दिएको अवस्थामा अख्तियारले छोरी पोषण पन्थीलाई पक्राउ गरेको आयोगले जनाएको छ ।
मंगलबार कम्पनी रजिष्ट्रारको कार्यालयमा दर्ता रहेको स्कुलको बाँकी रहेको कर तिर्न गएका सेवाग्राहीसँग पन्थीले एक लाख घुस मागेकी थिइन् । उनले घुस मागेको भन्ने सूचना पाएपछि अख्तियारले टोली खटाएको थियो ।
घटनाबारे थप अनुसन्धान भैइरहेको अख्तियारले जनाएको छ ।
