रेशम चौधरीले लिए सांसदको सपथ
पुस १९, २०७५ । राष्ट्रिय जनता पार्टी (राजपा) नेपालका नेता एवं कैलाली क्षेत्र नम्बर १ बाट प्रतिनिधि सभामा निर्वाचित रेशम चौधरी सांसदको सपथ लिएका छन्।
बिहीबार संसद सचिवालयमा सभामुख कृष्णबहादुर महराले चौधरीलाई पद तथा गोपनीयताको शपथ दिलाएका हुन् ।
थारु भाषामा पद तथा गोपनियताको सपथ लिएका चौधरीलाई सपथपछि सभामुख महराले फूलमाया लगाइदिए । संघीय संसदका महासचिव मनोहर प्रसाद भट्टराईले चौधरीलाई सांसदको लोगो लगाइदिएका थिए । सपथ लगत्तै चौधरीलाई राजपाका नेताहरुले पनि उनलाई बधाई दिँदै फूलमाला लगाइदिएका थिए ।
२०७२ भदौ ७ गते टीकापुरमा भएको घटनामा ७ जना प्रहरीसहित ८ जनाको ज्यान गएको थियो । सो घटनामा संलग्न भएको भन्दै चौधरीविरूद्ध मुद्दा लागेको थियो । घटनापछि फरार रहेका चौधरीले सार्वजनिक नभइकनै प्रतिनिधि सभामा उम्मेद्वारी दिएका थिए । चौधरी सांसदमा निर्वाचित भएपछि गएको फागुनमा कैलाली जिल्ला अदालतमा आत्मसमर्पण गरेका थिए ।