सर्वदलीय बैठक : शान्ति र संविधानको पक्षमा एकजुट भएर लाग्ने प्रतिबद्धता
कात्तिक २१, २०८० । प्रमुख राजनीतिक दलले गणतन्त्र र लोकतन्त्रको रक्षाका लागि एकजुट भएर लाग्ने प्रतिबद्धता जनाएका छन् ।
सिंहदरबारमा बसेको सर्वदलीय बैठकले पछिल्लो समय संविधान र शान्ति प्रक्रियाबाट प्राप्त उपलब्धिविरुद्ध जनतामा उत्तेजना फैलाउने र यसका नेतृत्वकर्तामाथि लाञ्छना लगाउने क्रम बढेको निष्कर्ष निकालेको छ । बैठकपछि माओवादी केन्द्रकी उपाध्यक्ष पम्फा भुसालले शान्ति र संविधानमाथिको प्रहारलाई मिलेर प्रतिवाद गर्ने निचोड निस्किएको बताइन् ।
‘यदाकदा पानीको फोकाजस्तो छिटफुट देखापरेका प्रहारविरुद्ध मिलेर प्रतिवाद गर्ने सर्वसम्मत निष्कर्ष निस्कियो । जीवनभरी लडेका परिवर्तन गरेका नेताहरू गणतन्त्रको रक्षा गर्नेमा प्रतिवद्ध छौं ।’
बैठकपछि एमाले सचेतक महेश बर्तौलाले व्यवस्थामाथि जसरी जनस्तरबाट नकारात्मक टिप्पणीहरु गराउँने, खेती भईरहेको छ र जसरी सामाजिक सञ्जाललाई दुरुपयोग गर्न खोजिएको छ त्यसको बारेमा छलफल भएको बताए ।
पार्टीले सरकारका अकर्मण्यताले छाडातन्त्र मौलाएको भन्दै ध्यानाकर्षण गराएको उनको भनाई छ । ‘हामीले पनि सरकारका कतिपय कामहरुका कारणले गर्दा मुलुकमा छाडातन्त्र मौलाएको छ ।
विद्यामान साशकीय प्रणालीहरुमाथि चुनौती सिर्जना हुने काम भईरहेको छ, गृह प्रशासन कमजोर भएको मुकदर्शक भएको, दिनदहाडे विभिन्न खालको जघन्य प्रकृतीका हिंसात्मक घटनाहरु अगाडि बढिरहेका छन् । यी सबै पक्षमा विशेषगरि शान्ति, संविधान, विद्यामान व्यवस्था जसरी एकपछि अर्को जनतामा निराशाजनक प्रस्तुतीहरु भईरहेको छ । भनेका छौँ । ’
