बेवारिस कर्मचारीलाई प्रदेश पठाउने तयारी
साउन २७, २०७६ । उपत्यकाभित्रका स्थानीय तहले समायोजन गर्न नमानेपछि संघीय मामिला तथा सामान्य प्रशासन मन्त्रालयले १ सय २० कर्मचारीलाई प्रदेशमा पठाउने तयारी गरेको छ । गत चैतमै काठमाडौं र ललितपुर महानगरपालिकासहित उपत्यकाभित्रका स्थानीय तहमा समायोजन रोजेका उपसचिव देखि कार्यालय सहयोगीसम्मका १ सय २० कर्मचारीलाई विकल्पका रूपमा प्रदेशमा पठाउन तयारी थालिएको हो ।
मन्त्रालयबाट समायोजन रोजेर उपत्यकाभित्रका स्थानीय तहमा गएका चार तहदेखि दसौं तहसम्मका कर्मचारीलाई काठमाडौं महानगर, ललितपुर महानगर, भक्तपुर नगरपालिका, शंखरापुर नगरपालिका, कागेश्वरी मनोहरालगायतले हाजिर नगराई फिर्ता पठाएपछि कर्मचारीहरू सिंहदरबारमै बेवारिस बनेका छन् । स्थानीय तहले हाजिर नगराएपछि मन्त्रालयबाटै तलब भत्तालगायत सेवासुविधा बुझदै आएका कर्मचारीलाई साउन १९ देखि मन्त्रालयले पनि हाजिर गराएको छैन ।