विदेशमा रहेका नेपाली नागरिकको मतदाता नामावली दर्ता प्रक्रिया अघि बढ्यो
कात्तिक ३, २०८० । निर्वाचन आयोगले विदेशमा रहेका नेपाली नागरिकको मतदाता नामावली दर्ता गर्नको लागि प्रक्रिया अघि बढाएको छ । विदेशमा रहेका नेपाली नागरिकलाई विदेशबाटै मतदाता नामावलीमा नाम दर्ता गर्ने प्रक्रिया अघि बढाएको आयोगले जनाएको छ । यसका लागि आयोगले विदेशमा रहेका नेपाली नागरिकको मतदाता नामावली अद्यावधिक कार्यविधि, २०८० को मस्यौदा सार्वजनिक गरेको छ । सो मस्यौदा आयोगले आफ्नो वेबसाइटमार्फत् कार्यविधिको मस्यौदा सार्वजनिक गरेको छ ।
मस्यौदामा आयोगले विदेशमा रहेका नेपाली नागरिकको मतदाता नामावलीमा नाम दर्ता गर्नका लागि मुलुक तोकेर उक्त मुलुकको सम्बन्धित कूटनीतिक नियोगबाट दर्ता गर्ने केन्द्र तोक्ने व्यवस्था गरेको आयोगका सहसचिव एवं प्रवक्ता शालिग्राम पौडेलले बताउनुभयो ।
मस्यौदामा दर्ता गर्ने प्रयोजनका लागि दर्ता कर्मचारी तोक्न आयोगले परराष्ट्र मन्त्रालयलाई लेखी पठाउने व्यवस्था राखिएको छ । विदेशमा रहेका नेपाली नागरिकले मतदाता नामावलीमा नाम दर्ता गराउन चाहेमा अनलाइन प्रणालीमार्फत् फारम भरी जैविक ९बायोमेट्रिक० विवरण दिनका लागि आफूलाई पायक पर्ने स्थान र मिति प्रणालीबाट छनोट गर्न सक्ने प्रवक्ता पौडेलले बताउनुभयो । त्यसरी जैविक विवरण दिएपछि सम्बन्धित व्यक्तिको स्थायी ठेगानामा नाम दर्ता गरिने व्यवस्था कार्यविधिमा उल्लेख गरिएको छ ।
यसरी दर्ता भएका व्यक्तिको विवरण अन्तिम मतदाता नामावली प्रकाशन हुने समयमा आयोगमा प्राप्त गरी अद्यावधिकको प्रक्रियामा लाने व्यवस्था रहेको छ । कार्यविधिमा मतदाता नामावलीमा नाम दर्ता गर्ने कार्यलाई प्रभावकारी रूपमा सञ्चालन गर्न र त्यस्तो विषयमा आवश्यक निर्देशन दिन, समन्वय तथा अनुगमन गर्नका लागि आयोगका सचिवको संयोजकत्वमा केन्द्रीय समन्वय तथा अनुगमन समिति रहने व्यवस्था गरिएको छ ।
समितिको सदस्यमा आयोगका सहसचिव एवं निर्वाचन व्यवस्थापन महाशाखा प्रमुख, गृह मन्त्रालयका सहसचिव, परराष्ट्र मन्त्रालयका सहसचिव, आयोगकै सूचना प्रविधि शाखा प्रमुख सदस्य रहने व्यवस्था गरिएको छ । मतदाता नामावली तथा निर्वाचन सञ्चालन शाखा प्रमुख सदस्य–सचिव रहने व्यवस्था छ ।
कार्यविधिको मस्यौदामा रहेका व्यवस्थालगायतका अन्य विषय थप परिमार्जन वा सुधार गर्न सुझाव दिन चाहने विदेश वा स्वदेशमा रहेका नेपाली नागरिक, गैरआवासीय नेपाली संघ तथा अन्य सरोकारवालाले यही कात्तिक मसान्तभित्र आयोगको इमेल ठेगानामा राय सुझाव उपलब्ध गराइदिनुहुन सम्बद्ध सबैलाई अनुरोध गरेको छ । यो खबर नेपाल समाचारपत्रबाट लिएका हौ ।
