केही दिनभित्रै मनसुन पुनः सक्रिय
साउन १७, २०७६ । एक सातायता निस्कृय रहेको मनसुन अब सक्रिय हुने भएको छ । मनसुन सक्रिय गराउने न्यूनचापीय रेखा (मनसुन ट्रफ) भारतको उत्तरी भू–भागतर्फ सर्ने क्रम शुरु भएसँगै नेपालमा वर्षाको प्रभाव दोहोरिने भएको हो ।
मनसुन ट्रफ सामान्य रेखा नजिक सर्न थालेको र केही दिनभित्रमा नेपाल नजिक आउने भएकाले निस्कृय मनसुन सक्रिय हुने जल तथा मौसम पूर्वानुमान महाशाखाका मौसमविद् राजु प्रधानाङ्गले बताउनुभयो ।
‘तत्काल निरन्तर र भारी वर्षाको संभावना नरहे पनि धेरै ठाउँमा मध्यमस्तरको वर्षा हुने गतिविधि विकास भइरहेको छ’–विहीवार साँझ उहाँले नेपाल समाचारपत्रसँग भन्नुभयो ।
न्यूनचापीय रेखा भारतको गंगानगर, अलाहवाद, कलकत्ता, बंगालको खाडीको शिर आसपासको भेगमा सरेको अवस्थालाई मौसमविद्हरु सामान्य अवस्थाका रुपमा बुझ्ने गर्छन् ।
काल्पनिक यस्तो रेखा ती क्षेत्रबाट भारतको उत्तरी दिशातर्फ सरेपछि नेपाली भू–भागमा मनसुनी प्रभाव पर्ने गर्छ भने ‘इन्डोग्याङगेटिक प्लेन’ भन्दा तल सरेको अवस्थामा मनसुन निस्कृय हुने गर्छ । मनसुनी रेखा नेपाल नजिक सरेपछि नेपालमा भारी वर्षा हुने गरेको प्रधानाङ्गले प्रष्ट्याउनुभयो ।
गंगा र यसका सहायक नदी एवं जलाधार क्षेत्रलाई समेट्ने भेगलाई मौसमविद्हरु ‘इन्डोग्याङगेटिक प्लेन’ का रुपमा बुझ्ने गर्छन् । भोलि शनिवारपछि मनसुन ट्रफ नेपालको तराईका भू–भाग नजिक सर्ने संभावना उच्च रहेको महाशाखाले जनाएको छ ।
विहीवार साँझदेखि मेघ गर्जनसहित मध्यम वर्षाका गतिविधि सुरु हुने र यो क्रम केही दिन जारी रहने महाशाखाद्धारा जारी विशेष बुलेटिनमा उल्लेख छ ।
आज शुक्रवार पश्चिमी पहाडी भेगका केही स्थानमा भारी वर्षाको सम्भावनासमेत रहेको महाशाखाले जनाएको छ । यो खबर नेपाल समाचारपत्रबाट लिएका हौ ।
