ओलीको प्रश्न : यो अर्थमन्त्रीको बजेट हो कि गठबन्धनको ?
जेठ १९, २०८१ । गठबन्धन सरकारका तर्फबाट आएको नयाँ बजेटले सहकार्य संस्कृतिको प्रतिनिधित्व नगरेको भनेर एमाले अध्यक्ष केपी शर्मा ओलीले आपत्ति जनाएका छन् ।
एमाले संसदीय दलको बैठकमा सांसदहरुलाई प्रशिक्षण दिँदै गठबन्धन दलका मुख्य नेता ओलीले बजेट अर्थमन्त्रीका तर्फबाट मात्र आएको जस्तो देखिएको भनेर टिप्पणी पनि गरेका छन् । ओलीले आगामी आर्थिक वर्षको बजेट अर्थमन्त्री र उनको दलको जस्तो बनेको भनेर टिप्पणी गर्दै सरकारमा सहभागी दलसँग परामर्श गरेर बजेट ल्याएको भए राम्रो हुने थियो भनेका छन् ।
ओलीको बजेट प्रतिक्रिया थियो— ‘यो बजेट सरकारमा सहभागी दलहरुसँग परामर्श गरेर आएको भए धेरै राम्रो बजेट हुन सक्थ्यो । छलफल नहुँदा यो अर्थमन्त्रीको बजेट हो कि अर्थमन्त्रीको पार्टीको बजेट हो कि जस्तो देखिन गएको छ । रकमको बाँडफाँड पनि त्यस्तै गरेर अलि बढी एकातिर ढल्किएको जस्तो देखिन्छ ।’
ओलीले यसरी एकतर्फी रुपमा आएको बजेटमा गम्भीर त्रुटि रहेको भन्दै संसदमा खुलस्त छलफल गर्न सांसदहरुलाई निर्देशन दिए । सांसदहरुले आफ्नो क्षेत्रमा बजेटको अवस्था के छ, कटौती भएको छ र अन्य क्षेत्रमा गएको छ भने कुरा उठाउन सक्ने उनको सुझाव थियो ।
अध्यक्ष ओलीले भने— ‘हामी बजेटलाई समर्थन गर्छौं र पारित पनि गर्छौं । तर यसको अर्थ बजेटमा रहेको कुनै पनि कमी औंल्याउनुहुँदैन भन्ने होइन ।’
ओलीले गठबन्धन भनेपछि सरकारले यसको मर्म र भावनालाई बिर्सन नहुने भन्दै सहकार्यमा एकलौटी चल्न नसक्ने धारणा व्यक्त गरेका थिए ।
