रियालिटी ‘बिग बोस ओटीटी ३’ चलाउँदै अनिल कपूर
जेठ १९, २०८१ । लोकप्रिय रियालिटी शो ‘बिग बोस ओटीटी ३’ लामो समयदेखि प्रतिक्षाको विषय बनिरहेको छ । ‘बिग बोस ओटीटी’को पहिलो सिजन करण जोहर र दोस्रो सिजन सलमान खानले होस्ट गरे । अब तेस्रो सिजन भने अभिनेता अनिल कपूरले होस्ट गर्ने भएका छन् ।
जियो सिनेमाले शुक्रबार आफ्नो इन्स्टाग्राम एकाउण्टमा शो ‘बिग बोस ओटीटी ३’को प्रोमो भिडियो शेयर गरेको छ । भिडियोमा अनिल कपूर देखिएपछि शोको होस्ट उनी भएको खुलेको हो ।
भिडियोमा शो चलिरहेको बेला अनिल कपूरको प्रवेश देखाइएको छ । यद्यपि अध्यारोका कारण उनको अनुहार प्रस्ट देखिएको छैन । अनिल कपूर सिटी बजाउँदै आफ्नो शैलीमा भन्छन्, ‘कुर्सी लिनुहोस् । धेरै भया झकास, अब केही विशेष गरौं ।’
‘बिग बोस ओटीटी ३’को प्रोमो हेरेर सलमान खानका फ्यान भने निरास भएका छन् । उनीहरुले सलमान बिना शो चल्न असम्भव रहेको प्रतिक्रिया दिएका छन् । एक फ्यानले लेखेका छन् ‘सलमान छैनन्, त शो छैन ।’ अर्का एक फ्यानले शो ‘फ्लप’ हुने लेखेका छन् ।
शो जूनबाट सुरु हुनेछ । तर कहिलेबाट प्रसारण हुने भन्ने निर्माताले मिति खुलाएका छैनन् । शोको पहिलो सिजन दिव्या अग्रवाल र दोस्रो सिजन एल्विश यादवले जितेका थिए ।
