मुख्यमन्त्रीको गुनासो: प्रशासनिक जटिलताका कारण काम हुन सकेन

Share this news:

असार १३, २०७५ । प्रदेश नं ५ का मुख्यमन्त्री शङ्कर पोखरेलले प्रशासनिक जटिलताका कारण परिणाममुखी काम हुन नसकेको गुनासो गर्नुभएको छ ।

आज बुटवलमा विभिन्न सञ्चारमाध्यममा आबद्ध पत्रकारहरुसँगको अन्तरक्रियामा उहाँले प्रशासनिक नेतृत्व आत्मकेन्द्रित छ भन्नुभयो ।

मुख्यमन्त्री पोखरेलले कर्मचारीको प्रादेशिक सांगठनिक स्वरुप निर्माण नभई उपलब्धि हासिल हुन नसक्नेमा जोड दिँदै संघीय प्रशासनमा व्यापक कटौती आवश्यक भएको धारणा व्यक्त गर्नुभयो । उहाँले प्रदेशले चाहेको जनशक्ति प्रदेशले नै नियुक्त गर्न पाउनुपर्ने उल्लेख गर्दै अहिले पनि प्रदेशमा रहेका कर्मचारी संघीय कर्मचारी नै भएको बताउनुभयो । उहाँले भन्नुभयो, “प्रदेशमा रहेका कर्मचारीको सरुवा, बढुवा संघीय सरकारले गर्छ ।”

मुख्यमन्त्री पोखरेलले कर्मचारीको समायोजनको कानून बने पनि प्रभावकारी काम नभएकामा असन्तुष्टि जनाउनुभयो । उहाँले प्रदेशमा स्रोतको बाँडफाँड नभई टुङ्गोमा पुग्न नसक्ने उल्लेख गर्दै समन्वयको ढाँचा निर्माण भएन भने त्यसले समस्या निम्त्याउन सक्छ भन्नुभयो ।

केन्द्रीय प्रसासनको सहयोग नभए संविधान कार्यान्वयनमा कठिनाइ आउने तर्क गर्दै मुख्यमन्त्री पोखरेलले प्रदेश नं ५ मा नीतिगत तहमा कुनै समस्या छैन भन्नुभयो । उहाँले आफूहरु नअलमलिएको र स्पष्ट भएको जानकारी दिँदै शहरको विकासका लागि स्थानीय तह नै सक्षम भएको बताउनुभयो । उहाँले भन्नुभयो, “हामीले बजेटमा प्राथमिकीकरण गरेर ब्रेक थ्रू नै गरेका छौँ ।”

Loading spinner

Leave a Reply

Your email address will not be published. Required fields are marked *